‘ಕಗ್ಗತ್ತಲ ಖಂಡ’ ಎಂದರೇನು?

by Nataraj Huliyar

ಇದನ್ನು ನೀವು ನಿಮ್ಮೂರ ಕಡೆಯೂ ನೋಡಿರಬಹುದು. ಜನ ಒಬ್ಬ ವ್ಯಕ್ತಿಗೆ, ಒಂದು ಊರಿಗೆ ಒಂದು ಸಲ ಯಾವುದೋ ಕಾರಣಕ್ಕೆ ಅಡ್ಡ ಹೆಸರಿಟ್ಟರೆ ಅದು ಜೀವಮಾನವಿಡೀ ಆ ವ್ಯಕ್ತಿತ್ವವನ್ನು, ಊರನ್ನು ನಿರ್ದೇಶಿಸಲು ಶುರು ಮಾಡುತ್ತದೆ! ಇದು ದೇಶಗಳ, ಖಂಡಗಳ, ಸಂಸ್ಕೃತಿಗಳ ಸಂದರ್ಭದಲ್ಲೂ ಆಗಿಬಿಟ್ಟರೆ ಏನಾಗುತ್ತದೆ? 

ಒಂದು ಕಾಲಕ್ಕೆ ಆಫ್ರಿಕಾದ ಬಗ್ಗೆ ಯುರೋಪಿನ ಬಿಳಿಯರು ಅಜ್ಞಾನದಿಂದ ಮಾಡಿದ ವರ್ಣನೆಯ ಪರಿಣಾಮವನ್ನು ಗಮನಿಸಿದರೆ ಇಂಥ ಅಡ್ಡಹೆಸರುಗಳ ಕ್ರೌರ್ಯ, ಪರಿಣಾಮ ನಿಮಗೆ ಗೊತ್ತಾಗುತ್ತದೆ. ಹತ್ತೊಂಬತ್ತನೇ ಶತಮಾನದ ಕೊನೆಗೆ ಹೆನ್ರಿ ಮಾರ್ಟಿನ್ ಸ್ಟ್ಯಾನ್ಲಿ ಆಫ್ರಿಕಾವನ್ನು ‘ಡಾರ್ಕ್ ಕಾಂಟಿನೆಂಟ್’ ಎಂದು ಕರೆಯತೊಡಗಿದ ನಂತರ, ಜಗತ್ತಿನ ನೂರಾರು ಭಾಷೆಗಳು ಅದನ್ನು ಕಪ್ಪು ಖಂಡ, ಕತ್ತಲ ಖಂಡ ಎಂದೆಲ್ಲ ಅನುವಾದಿಸಿಕೊಂಡವು. ಕನ್ನಡದವರು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ’ಕಗ್ಗತ್ತಲ ಖಂಡ’ ಎಂದು ಅನುವಾದಿಸಿಕೊಂಡರು! ಈ ಥರದ ಅನುವಾದಗಳಿಂದ ಒಂದು ಖಂಡವನ್ನು ನೋಡುವ ರೀತಿಯೇ ದಿಕ್ಕೆಟ್ಟು ಹೋದ ಕತೆ ನಂತರದ ಅರೆಜ್ಞಾನದ ಚರಿತ್ರೆಯ ಭಾಗವಾಗಿ ಹೋಗಿದೆ!  

ಮೊದಲಿಗೆ ಆಫ್ರಿಕಾ ಎನ್ನುವುದು ಏನು ಎಂಬುದನ್ನು ನೋಡಿ: ಹಲವು ದೇಶಗಳು ಹಾಗೂ ಹಲವು ಬಗೆಯ ಸಂಸ್ಕೃತಿಗಳ, ಬುಡಕಟ್ಟುಗಳ, ಅತ್ಯಂತ ಪ್ರಾಚೀನ ನಾಗರಿಕತೆಗಳ ಒಂದು ವಿಶಾಲ ಖಂಡ. ಹಾಗೆಯೇ ಆಫ್ರಿಕಾ ಎನ್ನುವುದು ಜಗತ್ತಿನಾದ್ಯಂತ ಹಲವು ಅರ್ಥಗಳನ್ನು ಸೂಚಿಸುವ ರೂಪಕ ಕೂಡ ಆಗಿದೆ. ನಾವೀಗ ಆಫ್ರಿಕಾ ಖಂಡ ಎಂದು ಕರೆಯುವ ಭೌಗೋಳಿಕ ಪ್ರದೇಶದಲ್ಲಿ ಪೂರ್ವ ಆಫ್ರಿಕಾ, ಪಶ್ಚಿಮ ಆಫ್ರಿಕಾ, ಸೆಂಟ್ರಲ್ ಆಫ್ರಿಕಾ, ಉತ್ತರ ಆಫ್ರಿಕಾ ಹಾಗೂ ದಕ್ಷಿಣ ಆಫ್ರಿಕಾಗಳಿವೆ. ದೇಶೀ ಜನರು ತಮ್ಮ ಪಾಡಿಗೆ ತಾವು ತಮ್ಮ ಜೀವನಕ್ರಮಗಳನ್ನು ರೂಪಿಸಿಕೊಂಡು ಬದುಕುತ್ತಿದ್ದ ಈ ಆಫ್ರಿಕಾ ಖಂಡಗಳನ್ನು ಹೊಕ್ಕು ಲಾಭ ಪಡೆಯುವ ದುರಾಸೆ ಐನೂರು ವರ್ಷಗಳ ಕೆಳಗೆ ಪಶ್ಚಿಮದ ಬಿಳಿಯರಿಗೆ ಹಾಗೂ ಕೆಲವು ಆಫ್ರಿಕೇತರರಿಗೆ ಹುಟ್ಟಿತು. 

೧೫೦೦ನೆಯ ಇಸವಿಯ ಹೊತ್ತಿಗೆ ಆಫ್ರಿಕಾದ ಕಡಲ ತೀರಗಳು ಯೂರೋಪಿಯನ್ನರಿಗೆ ಪರಿಚಿತವಾಗತೊಡಗಿದವು. ಯಾಕೆಂದರೆ, ಆ ಕಡಲ ತೀರಗಳಲ್ಲಿ ಆಫ್ರಿಕಾದ ದೇಶೀಯರನ್ನು ಮಾರಾಟ ಮಾಡುವ, ಕೊಳ್ಳುವ ಅಮಾನುಷ ವ್ಯಾಪಾರಿ ಚಟುವಟಿಕೆಗಳು ನಡೆಯಲಾರಂಭಿಸಿದ್ದವು. ಈ ಗುಲಾಮರ ಮಾರಾಟದಲ್ಲಿ ತಮ್ಮ ನಾಡಿನ, ತಮ್ಮ ಬುಡಕಟ್ಟಿನ ಜನರನ್ನೇ ಪರದೇಶದವರಿಗೆ ಮಾರಾಟ ಮಾಡುವ ಏಜೆಂಟರುಗಳಾಗಿ ಸ್ಥಳೀಯ ಆಫ್ರಿಕನ್ನರೂ ಸೇರಿಕೊಂಡಿದ್ದರು. ಈ ವ್ಯಾಪಾರದಲ್ಲಿ ಭಾಗಿಯಾಗಿದ್ದ ಯೂರೋಪಿಯನ್ನರಿಗೆ ಹಾಗೂ ಅರಬ್ಬರಿಗೆ ಮೊದಮೊದಲಿಗೆ ಆಫ್ರಿಕಾದ ಭೂಪ್ರದೇಶಗಳು ಅಷ್ಟಾಗಿ ಪರಿಚಯವಿರಲಿಲ್ಲ.  

ಹೆನ್ರಿ ಮಾರ್ಟಿನ್ ಸ್ಟ್ಯಾನ್ಲಿ(೧೮೪೧-೧೯೦೪) ಎಂಬ ವೆಲ್ಷ್-ಅಮೆರಿಕನ್ ಪತ್ರಕರ್ತ, ವಸಾಹತು ಅಧಿಕಾರಿ, ಲೇಖಕ ೧೮೭೮ರಲ್ಲಿ ‘ತ್ರೂ ದ ಡಾರ್ಕ್ ಕಾಂಟಿನೆಂಟ್, ಸಂಪುಟ- ೧’ ಪುಸ್ತಕ ಬರೆದ. ಅಲ್ಲಿ ಅವನು ಆಫ್ರಿಕಾ ಖಂಡವನ್ನು ‘ಡಾರ್ಕ್ ಕಾಂಟಿನೆಂಟ್’ ಎಂದು ಕರೆದಿದ್ದು ಯುರೋಪಿಯನ್ನರಿಗೆ ಆಫ್ರಿಕಾದ ಬಗ್ಗೆ ಸೀಮಿತ ತಿಳಿವಳಿಕೆಯಿದ್ದುದನ್ನು ಸೂಚಿಸುವಂತಿತ್ತು.  ಇದಾದ ನಂತರ, ಯೂರೋಪಿನ ಚರಿತ್ರೆಯ ಪುಸ್ತಕಗಳು ತಮಗೆ ಪರಿಚಯವಿರದ, ತಾವು ಕಾಣದ, ತಮಗೆ ನಿಗೂಢವಾಗಿರುವ, ಆಫ್ರಿಕಾ ಖಂಡವನ್ನು ‘ಡಾರ್ಕ್ ಕಾಂಟಿನೆಂಟ್’ ಎಂದು   ಬಣ್ಣಿಸತೊಡಗಿದವು. ಪೋಲಿಶ್-ಬ್ರಿಟಿಷ್ ಕಾದಂಬರಿಕಾರ ಜೋಸೆಫ್ ಕಾನ್ರಾಡ್ ೧೮೯೯ರಲ್ಲಿ ಬರೆದ 'ಹಾರ್ಟ್ ಆಫ್ ಡಾರ್ಕ್‌ನೆಸ್’ ಕಾದಂಬರಿಯಲ್ಲಿ ಸಾಮ್ರಾಜ್ಯಶಾಹಿಯ ನಿರ್ದಯತೆಯನ್ನು ತೋರಿಸಿದ; 'ಡಾರ್ಕ್‌ನೆಸ್’ ಎಂಬ ರೂಪಕವನ್ನು ಪಶ್ಚಿಮಕ್ಕೇ ತಿರುಗಿಸಿದ. ಆದರೂ ಈ ಕಾದಂಬರಿಯಲ್ಲಿ ಕಪ್ಪಿನ ಬಗ್ಗೆ ಪೂರ್ವಗ್ರಹ ಮುಂದುವರಿದಿದೆ ಎಂದು ಆಫ್ರಿಕನ್ ಲೇಖಕ ಚಿನುವ ಅಚಿಬೆ ತೋರಿಸುತ್ತಾನೆ.

‘ಡಾರ್ಕ್ ಕಾಂಟಿನೆಂಟ್’ ಎಂಬ ಬಣ್ಣನೆಯಲ್ಲಿರುವ ‘ಡಾರ್ಕ್’ ಎಂಬ ಪದಕ್ಕೆ ಮೇಲುನೋಟಕ್ಕೆ ಕತ್ತಲು ಎಂಬ ಅರ್ಥವಿದೆ; ಆದರೆ ಹೆನ್ರಿ ಮಾರ್ಟಿನ್ ಸ್ಟ್ಯಾನ್ಲಿ ಯೂರೋಪಿಯನ್ನರಿಗೆ ತಿಳಿಯದ, ಅಪರಿಚಿತವಾದ, (ಅನ್‌ನೋನ್), ಈ ಕುರಿತು ಅಜ್ಞಾನವಿರುವ ಖಂಡ ಎಂಬ ಅರ್ಥದಲ್ಲಿ ಈ ಬಣ್ಣನೆಯನ್ನು ಬಳಸಿದ್ದ. ಈ ಪದಗುಚ್ಛವನ್ನು ಕನ್ನಡದ ಪಠ್ಯಪುಸ್ತಕಗಳು ‘ಕಗ್ಗತ್ತಲ ಖಂಡ’ ಎಂದು ಅನುವಾದಿಸಿಕೊಂಡವು. ಹಿಂದಿಯಲ್ಲಿ ‘ಅಂಧಾ ಮಹಾದ್ವೀಪ್’; ಉರ್ದುವಿನಲ್ಲಿ ’ತಾರೀಕ್ ಬರ್‍ರೆ ಆಝಮ್’… ಹೀಗೆಲ್ಲಾ ಇದು ಅನುವಾದಗೊಂಡಿತು. ಜರ್ಮನ್ ಭಾಷೆಯಲ್ಲಿ ಇದು der schwarze Kontinent ಎಂದು ಅನುವಾದಗೊಂಡು ’ಬ್ಲ್ಯಾಕ್ ಕಾಂಟಿನೆಂಟ್’ ಅಥವಾ ’ಕಪ್ಪು ಖಂಡ’ ಎಂದಾಯಿತು.

ಹೀಗೆ ಲೋಕದ ಭಾಷೆಗಳಲ್ಲಿ ‘ಡಾರ್ಕ್ ಕಾಂಟಿನೆಂಟ್’ ಎಂಬುದನ್ನು ಸೀಮಿತ ವಾಚ್ಯಾರ್ಥದಲ್ಲಿ ಅನುವಾದಿಸಿಕೊಂಡಿದ್ದರ ಪರಿಣಾಮ: ಆಫ್ರಿಕಾ ಎಂದರೆ ‘ಕತ್ತಲ ಪ್ರದೇಶ’ ಎಂಬ ಅರ್ಥ ಜನರ ತಲೆಯಲ್ಲಿ ಉಳಿದುಬಿಟ್ಟಿತು. ಈ ಅಂಶ ಒಂದು ಸಂಸ್ಕೃತಿ ಕುರಿತ ಬಣ್ಣನೆಯನ್ನು ಇನ್ನೊಂದು ಸಂಸ್ಕೃತಿ ಅನುವಾದಿಸಿಕೊಳ್ಳುವುದರಲ್ಲಿ ಇರುವ ಸಮಸ್ಯೆಯನ್ನು ಮಾತ್ರ ಹೇಳುತ್ತಿಲ್ಲ; ಭಾರತವೂ ಸೇರಿದಂತೆ ಜಗತ್ತಿನ ಉಳಿದ ಭೂಭಾಗಗಳು ಆಫ್ರಿಕಾವನ್ನು ಸೀಮಿತ ಅರ್ಥದಲ್ಲಿ ಹಾಗೂ ಅಪೂರ್ಣವಾಗಿ ಗ್ರಹಿಸಿದ್ದವೆಂಬುದನ್ನೂ ಹೇಳುತ್ತದೆ. ಇವತ್ತಿಗೂ ಇಂಡಿಯಾದ ಶಾಲಾಕಾಲೇಜು ಪಠ್ಯಗಳಲ್ಲಿ ಜಗತ್ತಿನ ಚರಿತ್ರೆಯನ್ನು ಬೋಧಿಸುವಾಗ ಯೂರೋಪಿಯನ್ ಚರಿತ್ರೆಯನ್ನು ಹೆಚ್ಚು ಬೋಧಿಸಲಾಗುತ್ತದೆಯೇ ಹೊರತು, ಅಲ್ಲಿ ಆಫ್ರಿಕಾದ ಚರಿತ್ರೆಯ ಬಗೆಗಿನ ಗಮನ ತೀರಾ ಕಡಿಮೆ. ಇದು ಕೂಡ ಆಫ್ರಿಕಾ ಕುರಿತ ನಮ್ಮ ಅಜ್ಞಾನ ಮುಂದುವರಿಯುವಂತೆ ಮಾಡಿದೆ.

ಆದ್ದರಿಂದಲೇ, ಜಗತ್ತಿಗೆ ಅತ್ಯಂತ ಪ್ರಾಚೀನ ನಾಗರಿಕತೆಯನ್ನು ಕೊಟ್ಟ ಈಜಿಪ್ಟ್ ನಾಗರಿಕತೆ ಆಫ್ರಿಕಾದ ಕೊಡುಗೆ ಎಂಬುದನ್ನು ಮತ್ತೆ ಲೋಕಕ್ಕೆ ನೆನಪಿಸಬೇಕಾಗಿದೆ. ತಮ್ಮದೇ ಆದ ಆಡಳಿತ ಪದ್ಧತಿ, ಜೀವನ ಕ್ರಮ, ಕೃಷಿ ಪದ್ಧತಿಗಳನ್ನು ಹೊಂದಿ ಸ್ವಾಯತ್ತವಾಗಿದ್ದ ಆಫ್ರಿಕನ್ ಸಮಾಜಗಳು ಹಾಗೂ ಅಲ್ಲಿನ ಜನಜೀವನ ೧೬ನೆಯ ಶತಮಾನದ ಆರಂಭದಿಂದ ಬಿಳಿಯರಿಂದ ಭೀಕರ ಬಿಕ್ಕಟ್ಟನ್ನು ಎದುರಿಸಬೇಕಾಯಿತು. ಅದಕ್ಕೆ ಕಾರಣ, ಆಫ್ರಿಕಾದ ದೇಶೀಯರನ್ನು ಗುಲಾಮರನ್ನಾಗಿ ಮಾರಾಟ ಮಾಡಲಾರಂಭಿಸಿದ ಹೃದಯಹೀನ ಮಾರುಕಟ್ಟೆ. ಈ ಮಾರಾಟ ಮುಂದಿನ ನಾಲ್ಕು ಶತಮಾನಗಳವರೆಗೂ ಮುಂದುವರಿದು ಆಫ್ರಿಕಾದ ದೇಶೀಯರು ‘ಕರಿಯರು’ ಎನ್ನಿಸಿಕೊಂಡು ಜಗತ್ತಿನ ಹಲವು ಭೂಭಾಗಗಳಲ್ಲಿ ಹರಿದು ಹಂಚಿಹೋದರು. 

ಹೀಗೆ ಆಫ್ರಿಕಾದ ಅತ್ಯಂತ ಶಕ್ತ ಮಾನವ ಸಂಪನ್ಮೂಲದ ಕಳವು-ಹರಾಜು-ಮಾರಾಟ-ಕೊಳ್ಳುವಿಕೆಯ ಕ್ರೌರ‍್ಯ ನಡೆಯುತ್ತಿದ್ದಾಗಲೇ ಆಫ್ರಿಕಾದ ಉಳಿದ ಸಂಪನ್ಮೂಲಗಳ ಕಡೆಗೂ ಯೂರೋಪಿನ ಕಣ್ಣು ಬಿತ್ತು. ಆಫ್ರಿಕಾದ ಖನಿಜಗಳು ಹಾಗೂ ಪಾಮ್ ಎಣ್ಣೆಗಳ ಮಾರಾಟವನ್ನೂ ಯೂರೋಪು ಆರಂಭಿಸಿತು. ಆ ಕಾಲಘಟ್ಟದ ಮತ್ತೊಂದು ಜಾಗತಿಕ ಬೆಳವಣಿಗೆಯನ್ನೂ ಇಲ್ಲಿ ನೆನಪಿಸಬೇಕು. ಯೂರೋಪಿನಲ್ಲಿ ೧೭೦೦ರಿಂದೀಚೆಗೆ ‘ಎನ್‌ಲೈಟನ್‌ಮೆಂಟ್ ಯುಗ’ವೆಂದು ಕರೆಯಲಾಗುವ ‘ದ ಏಜ್ ಆಫ್ ರೀಸನ್’ (ವಿವೇಚನೆಯ ಯುಗ) ಕೂಡ ಶುರುವಾಗಿತ್ತು. ಯುರೋಪಿನ ದಿಟ್ಟ ಚಿಂತಕರು ರಾಜಪ್ರಭುತ್ವವನ್ನು ಪ್ರಶ್ನಿಸುವ, ರಾಜರು ಜನರನ್ನು ಆಳಲು ತಾವೇ ನಿರ್ಮಿಸಿಕೊಂಡಿದ್ದ ದೈವೀಕವಚದ ಹಕ್ಕನ್ನು ಪ್ರಶ್ನಿಸುವ ಯುಗ ಆಗ ಆರಂಭವಾಗಿತ್ತು. ವಿಪರ್ಯಾಸವೆಂದರೆ, ಆಫ್ರಿಕಾದಿಂದ ಕದ್ದು ತಂದ ಗುಲಾಮರ ಮಾರಾಟವೂ ಅದೇ ಯುಗದಲ್ಲಿ ಯೂರೋಪಿನಿಂದಲೇ ನಡೆಯುತ್ತಿತ್ತು. 

ಹದಿನೆಂಟನೆಯ ಶತಮಾನದ ಸರಿಸುಮಾರಿಗೆ ಆಫ್ರಿಕಾ ಖಂಡದೆಡೆಗೆ ಕ್ರಿಶ್ಚಿಯನ್ ಧರ್ಮ ಪ್ರಸಾರದ ಪಯಣಗಳೂ ಆರಂಭವಾದವು. ಧರ್ಮಪ್ರಸಾರಕರು ತಮ್ಮ ದೇಶಗಳನ್ನು ಬಿಟ್ಟು ಆಫ್ರಿಕಾ ಖಂಡದತ್ತ ಹೊರಟರು. ಅಂಥವರಲ್ಲಿ ಆಫ್ರಿಕಾದ ನೈಲ್ ನದಿಯ ಮೂಲ ಹುಡುಕಿಕೊಂಡು ಹೋಗಿ ಹಲವು ವರ್ಷ ಕಾಣೆಯಾಗಿ, ನಂತರ ಪತ್ತೆಯಾದ ಸ್ಕಾಟ್‌ಲೆಂಡ್‌ನ ಕ್ರೈಸ್ತ ಮಿಷನರಿ ಲಿವಿಂಗ್ ಸ್ಟೋನ್ ಕೂಡ ಒಬ್ಬ. ಈತ ಕೂಡ ‘ಡಾರ್ಕ್ ಕಾಂಟಿನೆಂಟ್’ನ ಆಳಅಗಲಗಳನ್ನು ಹುಡುಕಿ ಹೊರಟವನು. ಸ್ಟ್ಯಾನ್ಲಿ ಮಾರ್ಟನ್ ಟಾಂಝಾನಿಯಾದಲ್ಲಿ ಪ್ರವಾಸದಲ್ಲಿದ್ದಾಗ ಉಜಿಜಿ ಎಂಬ ಸ್ಥಳದಲ್ಲಿ ಲಿವಿಂಗ್ ಸ್ಟೋನ್ ಅಕಸ್ಮಾತ್ ಅವನಿಗೆ ಸಿಕ್ಕ. ಆಗ ಸ್ಟ್ಯಾನ್ಲಿ ತೆಗೆದ ಉದ್ಗಾರ, ’ಡಾಕ್ಟರ್ ಲಿವಿಂಗ್ ಸ್ಟೋನ್, ಐ ಪ್ರೆಸ್ಯೂಮ್?’ ಎಂಬುದು ಮುಂದೆ ಇಂಗ್ಲಿಷಿನ ಪ್ರಖ್ಯಾತ ನುಡಿಗಟ್ಟಾಯಿತು.

ಲಿವಿಂಗ್ ಸ್ಟೋನ್ ಥರದವರ ಸಾಹಸಗಳ ನಡುವೆ ವಸಾಹತುಗಳ ಲಾಭದ ವಾಸನೆ ಹಿಡಿದಿದ್ದ ವಲಯವೂ ಯೂರೋಪಿನಲ್ಲಿ ಬೆಳೆಯುತ್ತಿತ್ತು. ಅಷ್ಟೊತ್ತಿಗಾಗಲೇ ಇಂಡಿಯಾ, ನಾರ್ತ್ ಅಮೆರಿಕಾಗಳಿಂದ ಲೂಟಿ ಹೊಡೆದು ತಂದ ಬಿಟ್ಟಿ ಸಂಪತ್ತಿನ ರುಚಿ ಹತ್ತಿದ್ದ ಯೂರೋಪಿನ ಹಲವು ದೇಶಗಳು ಹೊಸ ವಸಾಹತುಗಳನ್ನು ಹುಡುಕತೊಡಗಿದ್ದವು. ೧೮೮೦ರ ದಶಕದಿಂದೀಚೆಗೆ ಆಫ್ರಿಕಾದ ನಾಡುಗಳ ಮೇಲೆ ಹಿಡಿತ ಸಾಧಿಸಲು ಯೂರೋಪಿಯನ್ ದೇಶಗಳ ನಡುವೆ ಭೀಕರ ಕದನ ಶುರುವಾಯಿತು. ಚರಿತ್ರೆಯ ಪುಟಗಳಲ್ಲಿ ‘ಸ್ಕ್ರಾಂಬಲ್ ಫಾರ್ ಆಫ್ರಿಕಾ’ (ಆಫ್ರಿಕಾಕ್ಕಾಗಿ ಕಚ್ಚಾಟ) ಎಂದು ದಾಖಲಾಗಿರುವ ಘಟ್ಟ ಇದು. ೧೯೨೦ರ ಹೊತ್ತಿಗೆ ಬೆಲ್ಜಿಯಂ, ಫ್ರಾನ್ಸ್, ಇಟಲಿ, ಜರ್ಮನಿ, ಗ್ರೇಟ್ ಬ್ರಿಟನ್, ಸ್ಪೇನ್ ಹಾಗೂ ಪೋರ್ಚುಗಲ್ ದೇಶಗಳು ಆಫ್ರಿಕಾದ ಬಹುತೇಕ ಭಾಗಗಳನ್ನು ಆಕ್ರಮಿಸಿಕೊಂಡು, ಅವುಗಳನ್ನು ತಮ್ಮತಮ್ಮಲ್ಲೇ ಹಂಚಿಕೊಂಡು ವಸಾಹತುಗಳನ್ನಾಗಿಸಿಕೊಂಡವು. ಯಾರದೋ ದೇಶ! ಯಾರದೋ ಪಾರುಪತ್ಯದ ಜಾತ್ರೆ! ಹೇಗಿದೆ ನೋಡಿ! ಈ ಬಿಳಿಯ ಹದ್ದುಗಳ ಆಕ್ರಮಣದ ನಡುವೆ ಇಥಿಯೋಪಿಯಾ ಹಾಗೂ ಲೈಬೀರಿಯಾ ದೇಶಗಳು ಮಾತ್ರ ಅದು ಹೇಗೋ ತಮ್ಮ ಸ್ವಾತಂತ್ರ‍್ಯವನ್ನು ಉಳಿಸಿಕೊಂಡಿದ್ದವು. 

ಇಪ್ಪತ್ತನೆಯ ಶತಮಾನದಲ್ಲಿ ಇಂಡಿಯಾದಂತೆ ಆಫ್ರಿಕಾದ ದೇಶಗಳಲ್ಲೂ ಸ್ವಾತಂತ್ರ‍್ಯ ಚಳುವಳಿಗಳು ನಡೆದು ಈ ದೇಶಗಳು ಒಂದೊಂದಾಗಿ ಸ್ವತಂತ್ರವಾಗತೊಡಗಿದವು. ದಕ್ಷಿಣ ಆಫ್ರಿಕಾ ಬರೇ ಮೂವತ್ತೈದು ವರ್ಷಗಳ ಕೆಳಗೆ ಸ್ವತಂತ್ರವಾಯಿತು. ಆದರೆ ‘ಡಾರ್ಕ್ ಕಾಂಟಿನೆಂಟ್’ ಎಂಬ ಬಣ್ಣನೆ ಹಬ್ಬಿಸಿದ ಪೂರ್ವಗ್ರಹದ ಕೆಟ್ಟ ಪರಿಣಾಮ ಮಾತ್ರ ನಮ್ಮ ಮನಸ್ಸಿನಲ್ಲಿ ಹಾಗೇ ಉಳಿದುಬಿಟ್ಟಿದೆ. ಇದೆಲ್ಲ ನನಗೆ ಸರಿಯಾಗಿ ಅರ್ಥವಾಗಿದ್ದು ನನ್ನ ಪಿಎಚ್.ಡಿ.ಗಾಗಿ ಆಫ್ರಿಕನ್ ಸಾಹಿತ್ಯ ಹಾಗೂ ಕನ್ನಡ ಸಾಹಿತ್ಯ ಕುರಿತ ತೌಲನಿಕ ಅಧ್ಯಯನ ಮಾಡುತ್ತಿದ್ದಾಗ. ನಮ್ಮ ಪಠ್ಯಪುಸ್ತಕಗಳಿಂದಾಗಿ ಕೂಡ ಆಫ್ರಿಕಾ ಒಂದು ‘ಡಾರ್ಕ್ ಕಾಂಟಿನೆಂಟ್’ ಎಂಬ ಬಣ್ಣನೆ ಹಾಗೇ ಉಳಿದುಬಿಟ್ಟಿದೆ; ಅವನ್ನು ತೆಗೆಯುವ ಪ್ರಯತ್ನ ಆಗಬೇಕು. ಒಂದು ಸಂಸ್ಕೃತಿ ಕುರಿತು ಅನ್ಯ ಲೇಖಕರ ಅರೆಜ್ಞಾನದ ಬಣ್ಣನೆಯಿಂದ ಸಂಸ್ಕೃತಿಗೆ ಆಗುವ ಡ್ಯಾಮೇಜುಗಳು ಎಷ್ಟು ವರ್ಷಗಳಾದರೂ ಹಾಗೇ ಉಳಿದುಬಿಡುತ್ತವೆ ಎಂಬುದನ್ನು ಮರೆಯಬಾರದು.  

ಇಪ್ಪತ್ತನೆಯ ಶತಮಾನದಲ್ಲಿ ಎಲ್ಲೆಡೆ ಪರಿಚಿತವಿದ್ದ ’ಡಾರ್ಕ್ ಕಾಂಟಿನೆಂಟ್’ ಎಂಬ ರೂಪಕವನ್ನು ಮನೋವಿಜ್ಞಾನಿ ಸಿಗ್ಮಂಡ್ ಫ್ರಾಯ್ಡ್ ಕೂಡ ಬಳಸಿದ; ಆದರೆ ಬೇರೊಂದು ಸಂದರ್ಭದಲ್ಲಿ. ಫ್ರಾಯ್ಡ್ ೧೯೨೬ರಲ್ಲಿ ಬರೆದ ’ಕ್ವೆಶ್ಚನ್ ಆಫ್ ಲೇ ಅನಾಲಿಸಿಸ್’ ಎಂಬ ಪುಸ್ತಕದಲ್ಲಿ ಡಾರ್ಕ್ ಕಾಂಟಿನೆಂಟ್ ಎಂಬುದನ್ನು ಜರ್ಮನ್ ಭಾಷೆಗೆ ಅನುವಾದಿಸದೆ ಇಂಗ್ಲಿಷ್ ಭಾಷೆಯಲ್ಲೇ ಬಳಸಿದ ಬಣ್ಣನೆ ಇರುವ ಸಾಲು: 'after all, the sexual life of adult females is a dark continent for psychology.’ 

ಫ್ರಾಯ್ಡ್ ಹೇಳಿಕೆಯಲ್ಲಿ ಬಳಕೆಯಾದ 'ಡಾರ್ಕ್ ಕಾಂಟಿನೆಂಟ್’ ರೂಪಕದ ಬಗ್ಗೆ ಕೂಡ ಇವತ್ತು ನಮಗೆ ತಕರಾರು ಏಳಬಹುದು. ಆದರೆ ಮಾನವ ಮನಸ್ಸನ್ನು ಬಲ್ಲೆವೆಂಬ ಗತ್ತಿನಲ್ಲಿ ಉತ್ತರಿಸುವ ಸೈಕೋ-ಅನಲಿಸ್ಟರು, ಲೇಖಕರು ಕೂಡ ಫ್ರಾಯ್ಡ್ 'ಡಾರ್ಕ್ ಕಾಂಟಿನೆಂಟ್’ ಎಂಬ ಪದವನ್ನು 'ಅರಿವಿಗೆ ನಿಲುಕದ’ ಎಂಬ ಅರ್ಥದಲ್ಲಿ ಬಳಸುತ್ತಿರುವ ರೀತಿಯನ್ನು ಅರಿಯುವ ಅಗತ್ಯವಿದೆ. ಹಾಗೆಯೇ, ನಮ್ಮ ನಿತ್ಯದ ಮಾತು, ಬರವಣಿಗೆ, ಟೆಲಿವಿಷನ್ ಚರ್ಚೆ, ಪತ್ರಿಕೋದ್ಯಮಗಳ ಮಂದಿ ಅರೆಜ್ಞಾನದಿಂದ, ಅಜ್ಞಾನದಿಂದ ಎಲ್ಲವನ್ನೂ ವಿಶ್ಲೇಷಿಸಿ ಎಷ್ಟೆಲ್ಲ ಅಪಾಯ ಸೃಷ್ಟಿಸುತ್ತಿರಬಹುದು ಎಂಬ ಬಗ್ಗೆ ಆತ್ಮಪರೀಕ್ಷೆ ಮಾಡಿಕೊಳ್ಳುವ ಅಗತ್ಯ ಕೂಡ!